Rabitə və Yüksək Texnologiyalar Nazirliyi (RYTN) “Hər evə optika” layihəsini reallaşdırmağa başlayıb. Bu barədə cümə axşamı jurnalistlərə rabitə və yüksək texnologiyalar nazirinin müavini Elmir Vəlizadə məlumat verib.
“Hazırda Bakı, rayon mərkəzləri və ölkənin kəndlərinin 50%-i fiberoptik şəbəkə ilə təmin edilib. Söhbət qalan 50% kənddən, onların mövcud ümumi fiberoptik şəbəkəyə qoşulmasından gedir ki, biz bunu bu il həyata keçirməyi planlaşdırırıq”,- deyə E.Vəlizadə qeyd edib.
Onun sözlərinə görə, bu layihə üçün ilk maliyyə vəsaiti artıq tapılıb.
“Xəbər verildiyi kimi, “Hər evə optika” layihəsinin Dövlət Neft Fondunun maliyyə dəstəyi ilə həyata keçirilməsi planlaşdırılırdı. Lakin bu il layihənin həyata keçirilməsi üçün digər maliyyə resurslarının axtarılmasına qərar verildi. İlkin maliyyə vəsaiti $15 mln. məbləğində kredit şəklində cəlb olunub”, - deyə E.Vəlizadə bildirib.
Bununla yanaşı, o, kredit vəsaitlərinin kimdən cəlb olunduğu barədə dəqiq məlumat verməyib.
Onun sözlərinə görə, layihə üçün əlavə vəsaitin cəlb olunması üzrə işlər davam etdirilir. “Bu məsələ ilə bağlı beynəlxalq maliyyə strukturları və böyük şirkətlərlə danışıqlar davam etdirilir. Bir sıra iri şirkətlər layihəyə maraq göstərir, onun həyata keçirilməsi üçün kreditin ayrılması məsələsini nəzərdən keçirirlər. Ümumilikdə layihənin iqtisadi cəhətdən səmərəliliyi nəzərə alınmaqla, danışıqların müsbət nəticə verəcəyinə şübhə etmirik”, - deyə nazir müavini əlavə edib.
Xəbər verildiyi kimi, “Hər evə optika” layihəsinin Dövlət Neft Fondunun maliyyə dəstəyi ilə həyata keçirilməsi planlaşdırılırdı. Layihə ucqar regionlar da daxil olmaqla, ölkədə genişzolaqlı internetin (ADSL) inkişafına yönəlmişdi. Layihənin son məqsədi ucqar kənd yaşayış məntəqələri də daxil olmaqla, bütün ölkə ərazisini 10-100 meqabit saniyə həddində sürətli internetlə təmin etmək və genişzolaqlı internet istifadəçilərinin sayını 85%-ə çatdırmaqdır ki, bu da Azərbaycana 2017-ci ilədək dünyanın inkişaf etmiş ölkələrinin səviyyəsinə çıxmağa imkan verəcək.
N.Abbasova