2018-ci ilin dövlət büdcəsində neftin 1 bareli 45 dollardan hesablanıb. Bu barədə “İnterfaks-Azərbaycan” agentliyinə Maliyyə Nazirliyindən məlumat verilib.
2017-ci ilin dövlət büdcəsində isə neftin 1 bareli 40 dollardan hesablanmışdı.
"Beynəlxalq maliyyə təşkilatları 2018-ci ildə neftin 1 barelinin orta qiymətini 50 dollar səviyyəsində proqnozlaşdırır. Bundan irəli gələrək Azərbaycanın gələn il üçün dövlət büdcəsində neftin 1 barelinin qiyməti 45 dollar səviyyəsində götürülüb", - deyə məlumatda qeyd olunur.
Layihəyə əsasən gələn ilin dövlət büdcəsinin gəlirləri 20 mlrd. 127 mln. manat (2017-ci ilə olan proqnozla müqayisədə artım 20%), xərcləri 20 mlrd. 905,7 mln. manat (artım 16,5%), kəsiri 778,7 mln. manat və ya ÜDM-nin 1,1%-i səviyyəsində proqnozlaşdırılır.
Maliyyə Nazirliyinin məlumatına görə, 2018-ci ilin dövlət büdcəsində neft gəlirləri 11 mlrd. 96 mln. manat (2017-ci illə müqayisədə artım 39,7%), xüsusi çəki 55,1% təşkil edəcək.*
A.Əzizov