“Azərbaycan Dəmir Yolları” (ADY) QSC Bakı-Xırdalan-Sumqayıt qatarlarının hərəkətini 3 ay müddətinə dayandırır. Bu barədə “İnterfaks-Azərbaycan” agentliyinə ADY-dən məlumat verilib.
“Bakı-Sumqayıt avtomobil yolunun genişləndirilməsi işləri ilə əlaqədar Xırdalan dairəsində yerləşən dəmir yolu körpüsünün sökülərək yenidən tikintisi səbəbindən Bakı-Xırdalan-Sumqayıt istiqamətində elektrik qatarlarının hərəkəti müvvəqəti olaraq dayandırılır. Qatarlar avqustun 10-dan noyabrın 10-dək hərəkətdə olmayacaq”, – deyə məlumatda bildirilir.
Bakı-Sumqayıt yolunun genişləndirilməsi işləri Azərbaycan Avtomobil Yolları Dövlət Agentliyi tərəfindən həyata keçirilir. Xırdalan dairəsində yerləşən dəmir yolu körpüsü isə genişləndirmə işlərinə maneçilik törədir. Bu səbəbdən köhnə körpü söküləcək və onun yerində yeni biraşırımlı tağlı dəmir yolu körpüsü inşa olunacaq.
Körpünün tikintisi müddətində Sumqayıta gedən və ya ordan Bakıya gələn sərnişinlər Bakı-Pirşağı-Sumqayıt istiqamətində hərəkət edən elektrik qatarlarından istifadə edə biləcəklər.*
B.Rüstəmbəyov