Avropa İttifaqının (Aİ) ekspertləri Azərbaycanda su ehtiyatlarından səmərəli istifadənin təmin edilməsi ilə bağlı layihələrə cəlb edilə bilər.
Nazirlər Kabinetindən verilən məlumata görə, bu təklif baş nazirin müavini Şahin Mustafayevin bu gün Avropa İttifaqının Azərbaycandakı nümayəndəsi Kestutis Yankauskas ilə görüşü zamanı səsləndirilib.
“Görüşdə Azərbaycanla Avropa İttifaqı arasında əlaqələrin bir çox sahələrdə, xüsusilə enerji, investisiya, ticarət və s. sahələrdə inkişaf etdiyi, Avropa İttifaqının ölkəmizin əsas ticarət tərəfdaşlarından olduğu qeyd edilib. Azərbaycanda Avropa İttifaqı ilə müxtəlif proqramlar və layihələr çərçivəsində də səmərəli əməkdaşlıq həyata keçirilir. Bu xüsusda su ehtiyatlarından səmərəli istifadənin təmin edilməsi və su təsərrüfatının idarə olunmasının təkmilləşdirilməsi sahəsində Aİ ekspertləri cəlb edilməklə məlumat və təcrübə mübadiləsinin aparılması təklif edilib”, - deyə məlumatda bildirilir.
Görüşdə, həmçinin Aİ-Azərbaycan əməkdaşlıq gündəliyində duran bir sıra məsələlər, o cümlədən yeni hərtərəfli saziş üzrə danışıqların davam etdirilməsi və əlaqələrin perspektivləri müzakirə edilib.*
B.Rüstəmbəyov