2021-ci ilin yanvar-aprel aylarında Azərbaycan Dövlət Neft Fonduna (ARDNF) “Azəri-Çıraq-Günəşli” (AÇG) yataqlar blokundan hasil edilən mənfəət neftinin və “Şahdəniz” yatağından çıxarılan kondensatın satışından $1 milyard 479,352 milyon məbləğində vəsait daxil olub. Bu barədə “İnterfaks-Azərbaycan” agentliyinə fonddan məlumat verilib.
2021-ci ilin yanvar-aprel aylarında ARDNF-nin AÇG blokundan hasil edilən mənfəət neftinin satışından gəlirləri $1 milyard 437 milyon təşkil edib (azalma 23,2%- İF).
Bundan başqa, hesabat dövründə ARDNF-nin “Şahdəniz” yatağından hasil edilən mənfəət qazı və kondensatın satışından gəlirləri $42.352 milyon təşkil edib. Bu gəlir kondensat satışından əldə olunub (azalma 2,6 dəfə - İF).
“Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və elə həmin ilin dekabrın 12-də qüvvəyə minib. Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun 2050-ci ilədək işlənməsi haqqında yeni müqavilə imzalanıb.
Yeni müqavilə üzrə BP (Britaniya - layihənin operatoru) 30,37%, SOCAR 25%, “Chevron” (Amerika) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, “ITOCHU Oil” (Yaponiya) 3,65%, “Statoil” (Norveç) 7,27%, TPAO (Türkiyə) 5,73% pay sahibidir.
1999-cu ildə yaradılmış ARDNF-də neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qaz nəqlinə görə tranzit tariflərindən, dövlət əmlakının icarəsindən və digər mənbələrdən daxil olan gəlirlər toplanır.**
N.Abbasova