“Unibank” ASC $15 milyon məbləğində istiqrazlar yerləşdirib. Bu barədə “İnterfaks-Azərbaycan”a bankdan məlumat verilib.
“23 investor tərəfindən 24 sifariş təqdim edilib. Sifarişlərin nominal qiymətlə ümumi məbləği $15 milyon təşkil edib. Nəticədə, oktyabrın 26-da hərraca çıxarılan istiqrazlar yerləşdirilib”, - bankdan qeyd ediblər.
İstiqrazlar bir qiymətli kağız üçün nominalı $1 min olan 15 min qiymətli kağıza bölünüb.
İstiqrazın illik faiz dərəcəsi 6% təşkil edir (faiz ödənişləri rübdə bir dəfə həyata keçirilir).
Kağızların tədavül müddəti - 6 ildir. “Unibank” cəlb olunan vəsaiti daxili bazarda, həmçinin Azərbaycanın regionlarında əməliyyatlarının genişləndirilməsinə yönəldəcək.
"Unibank" ASC 2002-ci ilin oktyabr ayında yaradılıb və Azərbaycanın aparıcı banklarının onluğuna daxildir.
Səhmdarları 9 fiziki və 1 hüquqi şəxsdir. Bankın səhmlərinin 86,3839%-i Eldar Qəribova, 7,6004%-i “Canley Finance S.A.” şirkətinə (Lüksemburq) məxsusdur. Qalan səhmdarların payı 5%-dən çox deyil.**
X.Nəsirzadə