Azərbaycan prezidenti İlham Əliyev Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar hərbi xidmət vəzifələrini (xidməti vəzifələrini) yerinə yetirərkən və ya həqiqi hərbi xidmət dövründə xəsarət (yaralanma, travma, kontuziya) alması və ya xəstələnməsi nəticəsində əlilliyi müəyyən edilmiş hərbi qulluqçuların və daxili işlər orqanları əməkdaşlarının, habelə onların ailə üzvlərinin sosial müdafiəsiningücləndirilməsi ilə bağlı tədbirlər haqqında fərman imzalayıb.
Fərmana əsasən, 1997-ci il avqustun 2-dək olan xidmət dövründə Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş hərbi qulluqçulara, daxili işlər orqanlarının əməkdaşlarına və ya onların vərəsələrinə birdəfəlik ödəmə veriləcək.
Xüsusilə, I dərəcə əlilliyə görə – 8,8 min manat; II dərəcə əlilliyə görə – 6,6 min manat; III dərəcə əlilliyə görə – 4,4 min manat manat məbləğlərdə birdəfəlik ödəmə veriləcək.
Ödənişlər Əmək və Əhalinin Sosial Müdafiəsi Nazirliyi tərəfindən verilir.
Bu fərmanın sığorta ödənişi almış və barəsində sığorta ödənişinin verilməsinə dair qanuni qüvvəyə minmiş məhkəmə aktı olan hərbi qulluqçulara və daxili işlər orqanlarının əməkdaşlarına və ya onların vərəsələrinə şamil edilmir.
Həmçinin, fərmana əsasən, birdəfəlik ödəmənin verilməsi qaydasına dair təkliflərin hazırlanması, bu istiqamətdə yerinə yetiriləcək işlərin əlaqələndirilməsi məqsədilə aşağıdakı tərkibdə Komissiya yaradılır.
Komissiyanın üzvləri müdafiə nazirinin müavini, daxili işlər nazirinin müavini, ədliyyə nazirinin müavini, fövqəladə hallar nazirinin müavini, Dövlət Təhlükəsizliyi Xidməti rəisinin müavini, Dövlət Sərhəd Xidməti rəisinin müavini, Azərbaycan Respublikası Prezidentinin Təhlükəsizlik Xidməti rəisinin müavini, Azərbaycan Respublikası Strateji Obyektlərin Mühafizəsi Dövlət Agentliyi rəisinin müavini, Azərbaycan Respublikası Xüsusi Rabitə və İnformasiya Təhlükəsizliyi Dövlət Xidməti rəisinin müavini, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti rəisinin müavini və Azərbaycan Respublikası Dövlət Sığorta Kommersiya Şirkətinin sədridir.
Əmək və Əhalinin Sosial Müdafiəsi Nazirliyinin məlumatına görə, bu fərman 17-20 min şəxsi əhatə edəcək. 2022-ci ilin dövlət büdcəsindən bu məqsədlərə 50 milyon manat ayrılacaq. **
B.Rüstəmbəyov