Şənbə günü Dövlət Turizm Agentliyi tərəfindən İsmayıllı rayonunda “Basqal” Dövlət Tarix-Mədəniyyət Qoruğuna mediatur təşkil olunub. Bu barədə “İnterfaks-Azərbaycan”ın müxbiri məlumat verir.
Hazırda “Basqal” Dövlət Tarix-Mədəniyyət Qoruğunda turizm infrastrukturunun yaxşılaşdırılması məqsədilə yenidənqurma və bərpa işləri aparılır.
DTA-nın baş memarı Mizami Qasımov məlumat verib ki, qoruqda aparılan təmir-bərpa, konservasiya və yenidənqurma işlərinin 50%-i artıq tamamlanıb.
Şeyx Məhəmməd məscidinin içərisində, 8 tarixi məhəllənin birləşdiyi Bazar meydanında, Qalabaşı ərazisində, həmçinin qoruğun mühüm tarixi abidələrindən biri hesab olunan Basqal hamamında aparılan fundamental arxeoloji tədqiqatlar nəticəsində tarixi tapıntılar aşkarlanıb.
Basqal hamamı maddi-mədəniyyət nümunələrimizin qorunması məqsədilə dövlət nəzarətinə götürülüb, Bazar meydanında Hamam Muzeyi olaraq əsaslı şəkildə bərpa edilib.
Etnoqrafik və elmi-tarixi araşdırmalar nəticəsində Basqalın tarixi dərindən araşdırılaraq qoruğun elmi-inventar fondu hazırlanıb. Burada əski əlifba ilə yazılmış dini, elmi və sosial həyatla bağlı minlərlə qiymətli əlyazma mətni aşkar edilərək fonda təhvil verilib.
O cümlədən, Basqalda yaşayan əhalinin son iki yüz il ərzində məşğuliyyəti, sənətkarlıq nümunələrinin tarixi təkamülü üzə çıxarılıb, elmi-publisistika və mədəni turizm sahələrində istifadə ediləcək çoxsaylı tarixi materiallar əldə olunub. **
X.Nəsirzadə