“Azərsu” SC 2013-cü ilin yayında Abşeronun 10 kənd və qəsəbəsində su təchizatı sistemlərinin yenidən qurulması üzrə işləri başa çatdıracaq. Bu barədə SC-nin İctimaiyyətlə əlaqələr şöbəsinin rəhbəri Anar Cəbrayıllı bu gün mətbuat konfransında məlumat verib.

“Hazırda “2011-2013-cü illərdə Bakı və ətraf qəsəbələrin sosial -iqtisadi inkişafı Dövlət Proqramı” çərçivəsində Abşeronun 30 kənd və qəsəbəsinin su və kanalizasiya sistemlərinin yaxşılaşdırılması üzrə işlər həyata keçirilir”, - deyə A.Cəbrayıllı qeyd edib.

Bundan əlavə, o söyləyib ki, Oğuz-Qəbələ-Bakı su kəmərinin istifadəyə verilməsi nəticəsində Bakıda fasiləsiz içməli su ilə təmin olunmuş abonentlərin sayı 35%-dən 60%-ə qədər artıb.

“2013-cü il ərzində paytaxtın Xətai, Nizami, Sabunçu və Suraxanı rayonlarının su təchizatı sistemləri yaxşılaşdırılacaq. Beləliklə, artıq cari ilin sonuna qədər bu rayonlardan olan abonentlər fasiləsiz içməli su ilə təmin olunacaqlar” - deyə A.Cəbrayıllı bildirib.

O həmçinin deyib ki, hazırda Azərbaycanda ümumilkdə 38 şəhər və rayonda, 250-dən çox kənddə su və kanalizasiya sistemlərinin yaxşılaşdırılması üzrə iş aparılır. 2014-cü ilə qədər Azərbaycanın 6-7 rayonunda işlər başa çatdırılacaq.