2013-cü ilin I yarısında “BTC Co” şirkətinin (Bakı-Tbilisi-Ceyhan - BTC neft kəmərinin tikintisi və istismarı üzrə operator) BTC layihəsi üzrə əsaslı xərcləri 2012-ci ilin analoji dövrü ilə müqayisədə 37,5% - $26 mln.-a qədər artıb. Bu barədə “İnterfaks-Azərbaycan” agentliyinə “BTC Co” şirkətinin mətbuat xidmətindən məlumat verilib.

“2013-cü ildə BTC neft kəmərinə xidmət üzrə əsas xərclərin həcmi $97 mln. səviyyəsində planlaşdırılır. I yarımillikdə bu məbləğdən $26 mln.-u xərclənib”, - deyə şirkətin nümayəndəsi bildirib.

Şirkətin məlumatına görə, BTC neft kəmərinin istismara verildiyi 2006-cı il iyunun 4-dən 2013-cü il iyun ayının sonuna qədər olan vəziyyətə görə, Ceyhan limanında 2227 tanker yüklənib, yəni BTC kəməri ilə dünya bazarına 229 mln. ton neft çatdırılıb.

BTC neft kəmərinin ötürmə qabiliyyəti sutkada 1,2 mln. barel neft təşkil edir. 2013-cü ilin I yarısında bu boru kəməri vasitəsilə 17 mln. ton neft nəql edilib, Ceyhan terminalından 169 tanker yola salınıb.

Hazırda BTC neft kəməri ilə “Azəri-Çıraq-Günəşli” yataqlar blokundan hasil edilən neft və “Şahdəniz” yatağından çıxarılan kondensat nəql olunur.

Bundan başqa, 2010-cu ilin iyun ayından başlayaraq BTC kəməri ilə Türkmənistan neftinin nəqli həyata keçirilir.

BTC neft kəmərinin uzunluğu 1768 km-dir. Bunun 443 km-i Azərbaycan, 248 km-i Gürcüstan, 1077 km-i Türkiyə ərazisindədir. Boru kəmərinin ötürmə qabiliyyəti sutkada 1,2 mln. barel neft təşkil edir.

Layihənin iştirakçıları “bp” (30.1%); SOCAR (25.00%); “Chevron” (8.90%); “Statoil” (8.71%); TPAO (6.53%); ENI (5.00%); “Itochu” (3.40%); “ConocoPhillips” (2.50%); “INPEX” (2.50%), “Total” (5.00%) və “ONGC” (2.36%) şirkətləridir.