Bakı, Ankara və Tehran nəqliyyat sahəsində əməkdaşlığın inkişafına tərəfdardır.

“Beynəlxalq tranzit dəhlizləri üzərində coğrafi cəhətdən əlverişli yerləşən üç ölkənin tranzit potensialından daha da yararlanmaq və beynəlxalq tranzit sisteminə daha yaxşı inteqrasiya etmək üçün nəqliyyat infrasturukturunun inkişafı sahəsində əməkdaşlığı dəstəkləyirik”, - deyə Azərbaycan, İran vəTürkiyə xarici işlər nazirlərinin İstanbulda baş tutan üçtərəfli görüşününyekunları üzrə qəbul olunmuş bəyannamədə bildirilir.

Nazirlər üç ölkə arasında bağlılığı artırmaq üçün geniş miqyaslı layihələrin əhəmiyyətini vurğulayaraq Bakı-Tbilisi-Qars dəmir yolunun təqdim etdiyi və hər üç ölkə üçün faydalı olacaq potensialdan tam istifadə etməyi təşviq ediblər.

Bəyannamədə qeyd olunur ki, beynəlxalq birləşmiş nəqliyyat regional ticarətin mütəmadi olaraq genişləndirilməsini asanlaşdıran vasitələrdən biridir və üçtərəfli ticarətin təşviqi tələblərindən irəli gələrək səmərəli, iqtisadi və effektiv intermodal nəqliyyat xidmətlərinin inkişafının stimullaşdırılmasına ehtiyac var.

Nazirlər, həmçinin enerji sahəsində kommersiya əməkdaşlığının genişləndirilməsi istəklərini ifadə ediblər.

Tərəflər iqtisadi əməkdaşlığı möhkəmləndirməyə, sərmayə və ticarətin təşviqi üçün mövcud imkanlardan istifadə etməyə və bərpa olunan enerji, nəqliyyat, sərhəd və gömrük, bank işi, telekommunikasiya, sənaye, kənd təsərrüfatı, turizm və ətraf mühit kimi sahələrdə birgə layihə və proqramların həyata keçirilməsi yolu ilə əməkdaşlığın genişləndirilməsinə razılaşıblar.

Bundan başqa, üç ölkənin biznes dairələri arasında yeni imkanların yaradılması və iqtisadi və ticarət münasibətlərinin daha da gücləndirilməsi üçün Üçtərəfli Biznes Forumun yaradılmasını təşviq ediblər, kiçik və orta sahibkarlar arasında iqtisadi və kommersiya əməkdaşlığının daha da yaxşılaşdırılmasını dəstəkləyiblər.*

B.Rüstəmbəyov