Ukraynanın Azərbaycandakı səfiri Vladislav Kanevski GUAM-ı təhlükəsizlik və iqtisadi əməkdaşlıq məsələlərinin müzakirə edilməsi üçün yaxşı platforma hesab edir.

“GUAM təkcə iqtisadiyyatın deyil, təhlükəsizlik, kibertəhlükəsizlik məsələlərinin, hüquq-mühafizə orqanlarının nümayəndələri arasında müxtəlif məsələlərin müzakirəsi üçün yaxşı platformadır. GUAM yeni əməkdaşlıq formalarını axtarmağa davam edir - GUAM + Yaponiya, GUAM + ABŞ, GUAM + Vişeqrad qrupu. Bu, əməkdaşlıq və qarşılıqlı fəaliyyət formatını inkişaf etdirməyə və genişləndirməyə imkan verəcək", – deyə V.Kanevski bu gün Bakıda keçirdiyi mətbuat konfransında bildirib.

Onun sözlərinə görə, bu ilin yayında Kiyev GUAM-ın baş katibi ilə təşkilata sədrlik məsələsini müzakirə edib.

Bundan əlavə, GUAM çərçivəsində bir sıra plan və layihələr barədə də söhbət gedib. İlk növbədə, bu, azad ticarət zonasının yaradılmasıdır ki, bu da ölkələrimizin iqtisadiyyatının inkişafında müsbət məqam olacaq. Böyük İpək Yolu layihəsinə, Asiya-Avropa logistika zəncirinə tələbat var", – deyə səfir qeyd edib.

Kanevski əlavə edib ki, oktyabr ayında GUAM-ın baş katibi ilə yeni görüş keçiriləcək. Görüşdə bir sıra layihələrin reallaşdırılması məsələsi müzakirə ediləcək.

"Biz GUAM-ın potensialından tam istifadə etmirik", - deyə diplomat vurğulayıb.*

F.İsazadə