Prezident İlham Əliyev 2015-ci ildə PKK terrorçuları tərəfindən qaçırılmış 13 Türkiyə vətəndaşının qətlə yetirilməsi ilə əlaqədar Türkiyə Respublikasının Prezidenti Rəcəb Tayyib Ərdoğana başsağlığı verib.

“Xain terror aktı nəticəsində Türkiyə vətəndaşları olan 13 günahsız mülki şəxsin qəddarcasına qətlə yetirilməsi xəbəri bizi olduqca sarsıtdı. Biz dinc insanlara qarşı yönəlmiş bu dəhşətli terror əməlindən hədsiz dərəcədə hiddətlənir, terrorizmin bütün təzahürlərini qətiyyətlə pisləyirik. Baş vermiş bu faciə ilə əlaqədar Sizə, qətlə yetirilənlərin ailələrinə və yaxınlarına, qardaş Türkiyə xalqına şəxsən öz adımdan və Azərbaycan xalqı adından dərin hüznlə başsağlığı verirəm”, - deyə dövlət başçısının saytında dərc olunmuş başsağlığı məktubunda bildirilir.

“Anadolu” agentliyinin məlumatına görə, Türkiyənin milli müdafiə naziri Hulusi Akar bu gün bildirib ki, Türkiyə Silahlı Qüvvələrinin İraqın şimalında keçirdiyi “Pençe Kartal-2” əməliyyatı zamanı 2015-ci ildə terrorçular tərəfindən qaçırılan 13 vətəndaşın cəsədi tapılıb.

“İlkin istintaq zamanı günahsız və silahsız mülki şəxslərdən birinin çiynindən, digər 12 nəfərin başından vurulduğu məlum oldu. Beləliklə, yenidən PKK-nın məkrli və qaniçən üzünü gördük”, - deyə nazir vurğulayıb.

Akar qeyd edib ki, həbs edilən iki PKK üzvünün dindirilməsi zamanı terrorçuların türk vətəndaşlarını əməliyyat haqqında məlumat aldıqdan sonra öldürdükləri məlum olub.

“Vətəndaşlarımızın qətlində iştirak edən bütün terrorçular məhv edildi”, - deyə o əlavə edib.*

N.Abbasova