Bakıda Azərbaycan Respublikası Hökuməti və Macarıstan Hökuməti arasında Enerji üzrə İşçi Qrupunun ikinci iclası keçirilib, iclasda qazın nəqli və bərpa olunan enerji sahəsində əməkdaşlıq məsələləri müzakirə olunub.

“İclasda Azərbaycan-Macarıstan arasında ikitərəfli enerji əməkdaşlığının cari vəziyyəti və mümkün əməkdaşlıq imkanları müzakirə olunub”, - Azərbaycan Energetika Naziriyindən məlumat verilir.

Xüsusilə, tərəflər Cənub Qaz Dəhlizi çərçivəsində iki ölkə arasında strateji əməkdaşlığın möhkəmləndirilməsi, Macarıstana təbii qaz nəqli imkanları, o cümlədən LNG və CNG nəqli və paylanması sahəsində əməkdaşlıq, Macarıstanın MOL Qrupunun Azərbaycandakı fəaliyyəti, 2 ölkənin enerji tənzimləyici qurumları arasında imzalanmış memorandumdan irəli gələn məsələlər, eləcə də enerji səmərəliliyi və bərpa olunan enerji sahəsində əməkdaşlığa dair müzakirələr aparıblar. İclas çərçivəsində Azərbaycanda bərpa olunan enerji potensialı və bu potensialın reallaşdırılması istiqamətində həyata keçirilməsi nəzərdə tutulan layihələrlə bağlı təqdimat nümayiş etdirilib.

Macarıstan Hökuməti tərəfindən İşçi Qrupunun sədri, Enerji və İqlim məsələləri üçün xüsusi tapşırıqlar üzrə səfir Dora Zombori Budapeştin Azərbaycanla enerji sahəsində əməkdaşlığının inkişafına xüsusi önəm verdiyini bildirib.

Sonda Enerji üzrə İşçi Qrupunun ikinci iclasının yekunlarına dair protokol imzalanıb. İşçi Qrupunun növbəti iclası Macarıstanda keçiriləcək.

Xəbər verildiyi kimi, Macarıstan 2020-ci ilin ortalarından Azərbaycan qazının alışına ümid edir. Alışın həcmi illik 2 milyard kubmetrədək təşkil edə bilər. **

R.Kərimov