2022-ci ilin yanvar-iyun aylarında İqtisadiyyat Nazirliyi yanında Dövlət Vergi Xidmətinin (DVX) xətti ilə dövlət büdcəsinə vergi və rüsüm daxilolmaları 49,3% - 6 milyard 482 milyon 48,5 min manata qədər artıb.

“İnterfaks-Azərbaycan” agentliyi DVX-nin məlumatına istinadən xəbər verir ki, hesabat dövründə proqnoza 146,7% əməl edilib.

Ödənilən vergilərin 67,8%-i qeyri-neft-qaz sektorunun, 32,2%-i isə neft-qaz sektorunun payına düşüb.

Qeyri-neft-qaz sektorundan daxilolmalar 4 milyard 398 milyon 64,3 min manat (artım 38,1%) olub, proqnoza 128,6% əməl edilib.

Neft-qaz sektorundan daxilolmalar 2 milyard 83 milyon 984,2 min manat təşkil edib.

2022-ci ilin yanvar-iyun aylarında məcburi dövlət sosial sığorta haqları üzrə daxilolmalar 2 milyard 225 milyon 624,2 min manat təşkil etməklə ötən ilin müvafiq dövrü ilə müqayisədə 21% artıb. İşsizlikdən sığorta haqları üzrə daxilolmalar 21,9% artaraq 77,035 milyon manat təşkil edib.

2022-ci il iyul ayının 1-nə aktiv vergi ödəyicilərinin sayı ilin əvvəli ilə müqayisədə 3,4% artaraq 688,011 min olub. Hesabat dövründə aktiv ƏDV ödəyicilərinin sayı isə 37,029 min vahid təşkil edib.

2022-ci ildə DVX xətti ilə dövlət büdcəsinə daxilolmaar 11 milyard 740 milyon manat səviyyəsində nəzərdə tutulur. **

B.Rüstəmbəyov