Moody`s Investors Service Beynəlxalq reytinq agentliyi SOCAR şirkətinin reytinqini “Ba2”-dən “Ba1” səviyyəsinədək yüksəldib, buna korporativ ailə reytinqi (CFR) və yüksək təminatsız reytinqi daxildir. Bu barədə “İnterfaks-Azərbaycan” agentliyin məlumatına istinadən xəbər verir.

Eyni zamanda, Moody`s SOCAR-ın əsas kredit qiymətləndirməsini (BCA) “b1”-dən “ba3”-dək və defolt reytinqinin (PDR) ehtimalını “Ba2”-dən “Ba1”-dək yüksəldib.

O cümlədən, agentlik şirkətin proqnozu “müsbət”dən “stabil”ə dəyişib.

Məlumatda bildirilir ki, SOCAR-ın reytinqlərinin dəyişməsi bu yaxınlarda Azərbaycanın reytinqlərinin “Ba2”-dən “Ba1”-dək yüksəlməsi ilə şərtlənir.

Avqustun 5-də Moody`s Azərbaycanın uzunmüddətli emitent və prioritet təmin olunmamış öhdəliklər reytinqlərini yüksəldib. Reytinq üzrə proqnoz “müsbət”dən “stabil”ə dəyişib.

“Bugünkü reytinq suveren reytinq fəaliyyətinə uyğundur və SOCAR-ın dövlətlə güclü kredit əlaqələrini, həmçinin Azərbaycanın əməliyyat və makroiqtisadi mühitinə əhəmiyyətli dərəcədə bağlılığı əks etdirir.

Azərbaycanın reytinqlərinin yüksəlməsi son illərdə siyasətin səmrələliliyini əks etdirir, bu da büdcə idarəçiliyinin yaxşılaşması və gələcək şokları amortizasiya etmək bacarığının artırılmasında ifadə olunur. Pandemiyaya baxmayaraq, iqtisadi dirçəliş və yüksək karbohidrogen qiymətləri fonunda ehtiyatlı fiskal idarəetmə sayəsində fiskal göstəricilər güclü olaraq qalıb və gözləniləndən daha tez yaxşılaşır. Moody`s hökumətin antiinflyasiya tədbirlərinin və Azərbaycan Mərkəzi Bankının (AMB) proaktiv makroiqtisadi siyasətinin Rusiya-Ukrayna böhranı nəticəsində daha da kəskinləşən inflyasiya risklərinin qarşısını alacağını gözləyir. Nəticədə, SOCAR üçün əməliyyat və makroiqtisadi mühit onun kredit profilini dəstəkləyərək tədricən yaxşılaşacaq”, - məlumatda deyilir.

Agentlikdən əlavə edilib ki, Moody`s Azərbaycanın suveren reytinqlərinin və şirkətin vəziyyətinin dəyişəcəyi halda SOCAR-ın reytinqlərini təkrar nəzərdən keçirə bilər. **

R.Kərimov