Azərbaycan Prezidenti İlham Əliyev Alternativ və Bərpa Olunan Enerji Mənbələri üzrə Dövlət Agentliyi tərəfindən Sumqayıtda inşa olunan Azgüntex zavodunun açılışında iştirak edib.
Rəsmi mətbuatın məlumatına görə, Alternativ və Bərpa Olunan Enerji Mənbələri üzrə Dövlət Agentliyinin direktoru Akim Bədəlov dövlət başçısına məlumat verib ki, Azgüntex zavodunda iki istehsal xətti - Günəş modulları və LED lampaları xətləri fəaliyyət göstərəcək.
İ.Əliyev bu zavodda hazırlanan günəş panellərinin nümunələrinə baxış keçirib. Dövlət başçısına məlumat verilib ki, müəssisədə hər birinin gücü 42 vattdan 250 vatta qədər olan və 60 fotoelementlə təchiz edilən bu panellər beynəlxalq standartlar səviyyəsində hazırlanacaq və sabit enerji verəcəkdir.
İ.Əliyevə həmçinin “Min ev - min elektrostansiya” layihəsi barədə məlumat verilib. Dövlət başçısına bildirilib ki, əsasən yaşayış binaları üçün nəzərdə tutulan bu layihə hər bir evin müstəqil şəkildə günəş enerjisini elektrik enerjisinə çevirən, ekoloji cəhətdən təmiz və təhlükəsiz kiçik elektrik stansiyası ilə təchizinə yönəlib. Bununla yanaşı, artıq qalan enerji şəbəkəyə ötürüləcək, gecə saatlarında isə şəbəkədən alınacaqdır.
Prezidentə bildirilib ki, bu zavodda ilkin mərhələdə il ərzində 120 min, gələcəkdə isə 240 min Günəş paneli istehsal olunacaq. Bundan başqa, müəssisədə 36 milyon LED çipi və 12 milyon LED lampası hazırlanacaq.
Dövlət başçısı həmçinin Sumqayıt Yüksək Texnologiyalar Parkının yaradılacağı ərazini seyr edib
Prezidentə illik emal gücü 146 min ton təşkil edəcək Sumqayıt məişət tullantıları emalı zavodunun layihəsi təqdim edilib.