Dağlıq Qarabağ ərazisi, Xankəndi şəhəri daxil olmaqla Azərbaycanın işğal olunan əraziləridir və bu torpaqlarda ermənilərin hər hansı fəaliyyəti qanunsuzdur. Bu barədə YAP-ın icra katibinin müavini, Milli Məclisin deputatı Mübariz Qurbanlı cümə axşamı jurnalistlərə bəyan edib.
“İşğal edilən torpaqlarda aeroportun açılışı bir tərəfdən Azərbaycanın ərazi bütövlüyünün pozuntusudur. Digər tərəfdən isə, əgər Ermənistan birtərəfli şəkildə aeroportu istifadəyə verərsə, o zaman Azərbaycan dəfələrlə bildirildiyi kimi, adekvat addımlar atacaq”, - deyə deputat qeyd edib.
O həmçinin vurğulayıb ki, Beynəlxalq Mülki Aviasiya Təşkilatı (İCAO) bu məsələyə dair xəbərdarlıq edib və beynəlxalq uçuşlara qadağa qoyub.
“Ermənistan Azərbaycanın ərazilərində özbaşına hərəkət edə bilməz”, - deyə o əlavə edib.