Rusiyanın “Drujba narodov”(“Xalqlar dostluğu”) jurnalının bir buraxılışı Azərbaycan həsr edilib. Bu barədə Yazıçılar Birliyinin sədri, xalq yazıçısı Anar çərşənbə günü “İnterfaks-Azərbaycan” İnformasiya Agentliyinin mətbuat mərkəzində məlumat verib.
“Ədəbi-bədii “Drujba narodov” nəşrinin buraxılışlarından biri bütövlükdə Azərbaycana həsr edilib”, - deyə Anar bildirib.
Azərbaycan ədəbiyyatının təbliğatı sahəsində Birliyin fəaliyyəti barədə sualını şərh edərək yazıçı qeyd edib ki, həmin buraxılışda Azərbaycan yazışılarının şer və nəsrləri dərc edilib. “Bundan başqa, Ukrayna nəşrinin bir buraxılışı da Azərbaycan ədəbiyyatına həsr olunub. O cümlədən, yerli yazıçıların əsərləri Türkiyə və digər ölkələrin jurnallarında dərc edilib”, - deyə o bildirib.
Yazıçıların növbəti qurultayının keçirilməsi barədə sualı cavablandırarkən sədr qeyd edib ki, tarix hələ bəlli deyil. Lakin, çox ehtimal ki, gələn ilin əvvəlində keçiriləcək.
“Yazıçılar Birliyinin sədri postuna namizədliyimi irəli sürmək barədə qərarımı qurultaydan oncə elan edəcəyəm”, - deyə o bildirib.
“Biz uzun zamandır qurultay keçirməmişik, çünki cari problemlərin həlli ilə məşğul idik – təşkilatın binası əsaslı təmir edilirdi, həmçinin Birliyin yaradılmasının 75 illiyinin keçirilməsinə hazırlaşmışıq. Qurultay ikinci planda qalıb”, - deyə yazıçı əlavə edib.
Anar həmçinin vurğulayıb ki, təşkilatın 1,5 min üzvü var. Bu sayda insanlar üçün qurultayın keçirilməsi o qədər də asan iş deyil.
“Qurultayın keçirilməsi üçün Yazıçılar Birliyinin regional bölmələrindən nümayəndələr seçmək lazımdır. Lakin, bunu da etmək asan iş deyil. Cünki təşkilat rəhbərliyinin dəfələrlə xəbərdarlığına baxmayaraq, yalnız 200-300 nəfər üzvlüklərini təsdiq ediblər. Qalanları Birliyin binasında belə görünmürlər”, - deyə Anar bildirib.