2012-ci ilin yanvar-oktyabr aylarında Azərbaycan İpoteka Fondunun (AİF) vəsaitləri hesabına ipoteka kreditləşdirilməsinin həcmi 50,06 mln. manat təşkil edib. Bu barədə AİF-in məlumatında deyilir.
Xəbər verildiyi kimi, 2011-ci ilin yanvar-oktyabr aylarında AİF-in müvəkkil bankları 74,4 mln. manat məbləğində ipoteka kreditləri veriblər. Beləliklə, hesabat dövründə fondun agent bankları ipoteka kreditləşdirilməsinin həcmini 32,7% azaldıblar.
Ümumilikdə, 2006-cı ildən 2012-ci il oktyabrın 31-nə qədər AİF-in müvəkkil bankları 395,52 mln. manat məbləğində ipoteka kreditləri veriblər.
Fondun məlumatına görə, cari ilin 10 ayı ərzində AİF 74,68 mln. manat məbləğində kreditləri təkrar maliyyələşdirib.
Yanvar-oktyabr aylarında AİF-in 23 mln. manat məbləğində istiqrazları yerləşdirilib. Fond sosial ipotekanın verilməsi üçün dövlət büdcəsindən 20 mln. manat vəsait alıb.
31 oktyabr 2012-ci il tarixinə ipoteka krediti alanların 41%-i - 18-29, 31%-i - 30-35 yaşında, 28%-i yaşı 36-dan yuxarı olan şəxslərdir.
AİF 2005-ci ilin dekabr ayında yaradılıb və 2006-cı ilin mart ayında ipoteka kreditlərinin verilməsinə başlayıb. Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 27 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 35 min manat təşkil edir, illik faiz dərəcəsi 4%-dən çox deyil.
2011-ci ildə AİF-in vəsaiti hesabına ipoteka kreditləşdirilməsinin həcmi 95,54 mln. manat təşkil edib.