Azərbaycan İpoteka Fondu (AİF) yanvarın 21-də 5 mln. manat məbləğində istiqrazın yerləşdirilməsi üzrə hərrac keçirəcək. Bu barədə “İnterfaks-Azərbaycan” agentliyinə fonddan məlumat verilib.
Bu, altıncı emissiyadan fondun istiqrazlarının 3-cü yerləşdirilməsi olacaq. Hərraca bir qiymətli kağızın nominal dəyəri 1 min manat olan 5 min istiqraz çıxarılır.
İstiqrazlar 102,2% qiymətlə yerləşdiriləcək.
Qiymətli Kağızlar üzrə Dövlət Komitəsi (QKDK) 2012-ci il dekabrın 21-də AİF-in 40 mln. manat məbləğində istiqrazlarının altıncı emissiya prospektini qeydiyyata alıb. Emissiya hər bir istiqrazın nominal dəyəri 1 min manat olan 40 min istiqraza bölünüb. İstiqrazların tədavül müddəti 10 ildir. Kağızların ödəniş tarixi 6 noyabr 2022-ci ildir. İstiqrazlar illik 3% dərəcə ilə buraxılır.
2012-ci ilin dekabrında AİF altıncı emissiyadan istiqrazların yerləşdirilməsinə başlayıb.
İki hərrac çərçivəsində altıncı emissiyadan yerləşdirilmiş istiqrazların ümumi həcmi 6 mln. manat təşkil edir.
AİF 2009-2012-ci illərdə beş emissiya çərçivəsində ümumilikdə 240 mln. manat məbləğində istiqraz yerləşdirib.
AİF 2005-ci ilin dekabrında yaradılıb və 2006-cı ilin martında ipoteka kreditlərinin verilməsinə başlayıb. Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 27 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 35 min manat təşkil edir, illik faiz dərəcəsi 4%-dən çox deyil.
2012-ci ildə AİF-in vəsaitləri hesabına ipoteka kreditləşdirilməsinin həcmi 74,77 mln. manat təşkil edib.