Azərbaycanın işğal altında olan, o cümlədən İranla sərhəd torpaqları Ermənistan tərəfindən bu nəzarətsiz zona vasitəsilə narkotrafik üçün istifadə olunur. Bu barədə Azərbaycan Dövlət Sərhəd Xidmətinin (DSX) rəisi Elçin Quliyev bildirib.
"Azərbaycan dəfələrlə bəyan edib ki, onun işğal edilmiş əraziləri narkotrafik üçün istifadə olunur. Düşünürəm ki, Dövlət Departamentinin hesabatında Azərbaycan-İran sərhədinin Ermənistanın işğalı altında olan 132 kilometrlik hissəsi nəzərdə tutulur", - deyə E.Quliyev ABŞ Dövlət Departamentinin hesabatındakı məlumatı şərh edərkən söyləyib. Hesabatda deyilir ki, hər il Azərbaycan ərazisi ilə qanunsuz olaraq on tonlarla narkotik daşınır.
Bununla yanaşı, o bildirib ki, DSX-nin İstintaq İdarəsinə Dövlət Departamentinin hesabatında təqdim edilmiş məlumatın araşdırılması barədə tapşırıq verib.
Bundan başqa, E.Quliyev qeyd edib ki, 2015-ci ilədək sərhədçilər üçün hospital istismara veriləcək.