Ukrayna Milli Filarmoniyasının Musiqi salonunda Azərbaycan musiqisi günləri keçirilir. Bu barədə Bakı Şəhər Mədəniyyət və Turizm İdarəsindən məlumat verilib.
Tədbirin təşkilatçıları Ukrayna Mədəniyyət və Turizm Nazirliyi, Ukrayna Milli Bəstəkarlar İttifaqı (UMBİ), Azərbaycanın Kiyevdəki səfirliyi, Azərbaycan Bəstəkarlar Birliyi (ABB), Müslüm Maqomayev adına Azərbaycan Mədəniyyət Mərkəzi və “Ukrayna Azərbaycanlılarının Birləşmiş Diasporu” (UABD) Ümumukrayna İctimai Təşkilatıdır (ÜİT).
Aprelin 2-də UMBİ-nin konsert salonunda kamera musiqisi konserti, ertəsi gün Ukrayna Milli Filarmoniyasının Nikolay Lısenko adına Sütunlu zalında simfonik konsert, aprelin 4-də Ukrayna Milli Bəstəkarlar İttifaqının binasında yekun konsert olacaq.
Tədbir çərçivəsində, həmçinin “Ukrayna-Azərbaycan musiqi əlaqələri” mövzusunda “dəyirmi masa” da keçiriləcək.