Azərbaycan İpoteka Fondu (AİF) bazar ertəsi keçirilən hərracda 5 mln. manatlıq istiqraz yerləşdirib. Bu barədə fondun məlumatında deyilir.
“Təqdim edilən sifarişlərin ümumi həcmi 5 mln.197 min manat təşkil edib. Hərracın yekunları üzrə hərraca çıxarılmış istiqrazların bütün həcmi - 5 mln. manat yerləşdirilib”, - deyə məlumatda bildirilir.
Hərracda iki investor iştirak edib.
İstiqrazlar 101,1333% qiymətlə yerləşdirilib.
Qiymətli Kağızlar üzrə Dövlət Komitəsi (QKDK) 2012-ci i dekabrın 21-də AİF-in 40 mln. manatlıq təmin olunmuş istiqrazlarının altıncı emissiyasının prospektini qeydiyyata alıb. Emissiya bir qiymətli kağızın nominalı 1 min manat olan 40 min istiqraza bölünüb. İstiqrazların tədavül müddəti 10 il, ödəniş tarixi 6 noyabr 2022-ci ildir. İstiqrazlar illik 3% dərəcəsi ilə buraxılır.
AİF 2012-ci ilin dekabrında altıncı emissiyadan istiqrazların yerləşdirilməsinə başlayıb. Beş hərrac çərçivəsində altıncı emissiyadan yerləşdirilmiş istiqrazların ümumi həcmi 19 mln. manat təşkil edib.
Xəbər verildiyi kimi, 2009-2012-ci illərdə AİF beş emissiya çərçivəsində ümumi məbləği 240 mln. təşkil edən istiqraz yerləşdirib.
AİF 2005-ci ilin dekabrında yaradılıb və 2006-cı ilin martında ipoteka kreditlərinin verilməsinə başlayıb. Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 27 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.
2012-ci ildə AİF-in vəsaitləri hesabına ipoteka kreditləşməsinin həcmi 74,77 mln. manat təşkil edib.