Avqustun 1-dən etibarən «Azərbaycan Hava Yolları» QSC (AZAL) hamilə və zahı qadınların, həmçinin təzə anadan olan körpələrin yeni daşınma qaydalarının tətbiqinə başlayıb. Bu barədə QSC-nin məlumatında bildirilir.
Yeni qaydalara əsasən, AZAL-ın aviareysləri ilə 32 həftəlik hamilə, həmçinin doğuşdan sonra 7 günədək olan zahı qadınların daşınmasına icazə verilmir. Təzə anadan olan körpələr isə doğuşdan 7 gün sonra anası, atası və ya körpəyə məsuliyyət daşıyan şəxsin müşayiəti ilə AZAL-ın aviareyslərinə buraxılır.
Hamiləliyin 26-cı həftəsindən sonra (32-ci həftə daxil olmaqla) sərnişin aviaşirkətin rəsmi nümayəndəsinə qadını müalicə edən həkimdən onun sağlamlığı haqqında, hamiləliyin müddəti və onun növü (bətnində neçə körpənin olduğu), hamiləliyin patologiyasının olub-olmaması, uşaqsalma və ya vaxtından əvvəl doğuş təhlükəsinin olmamasını təsdiq edən arayış təqdim etməlidir.
26 həftəyədək hamilə qadınlar özlərinin və bətnindəki uşaqların sağlamlıqlarına təhlükə olduqda aviaşirkət tərəfindən müəyyən edilmiş formada aviaşirkətə qarşı iddia irəli sürülməməsini təsdiq edən razılıq əldə edilməlidir.