Sentyabrın 19-da İctimai Televiziya və Radio Yayımları Şirkətinin (İTV) canlı yayımında Azərbaycan prezidentliyinə namizədlər və onların nümayəndələrinin debatının videoyazısı öyrənilmək üçün Mərkəzi Seçki Komissiyasına (MSK) göndərilib. Bu barədə “İnterfaks-Azərbaycan” agentliyinə İTV-nin mətbuat xidmətindən məlumat verilib.
Məlumatda qeyd edilir ki, Milli Şuranın vahid namizədi Cəmil Həsənli təşviqat üçün ayrılmış efir vaxtından istifadə edərək, digər həmkarına cavab verib, sonra isə əsassız şəkildə yenidən vaxt tələb edib.
Aparıcının Seçki Məcəlləsinin tələblərini xatırladaraq C.Həsənlini Azərbaycan qanunvericiliyinə riayət etməyə dəvət etməklə bağlı xəbərdar etməsinə baxmayaraq, o, haqlı iradlara məhəl qoymayıb, çıxışını davam etdirib.
“C.Həsənli püşkatma ardıcıllığına uyğun olaraq qeydə alınmış prezidentliyə namizəd İlham Əliyevin səlahiyyətli nümayəndəsi Əli Əhmədovun təşviqat üçün ödənişsiz efir vaxtına dəfələrlə müdaxilə edib və dəyirmi masa iştirakçılarını təhqir etməkdən belə çəkinməyib”, - deyə İTV-nin mətbuat xidmətinin məlumatında bildirilir.
Qeyd olunur ki, beləliklə, C.Həsənli təşviqat üçün ayrılmış 6 dəqiqəlik ödənişsiz efir vaxtından başqa 6 dəqiqə 12 saniyə əlavə vaxtdan istifadə edib.
Bu vaxtın 5 dəqiqə 37 saniyəsi prezidentliyə namizəd Hafiz Hacıyevlə mübahisəyə gedib.
Efirdə yaranmış gərginlik nəticəsində qeyri-etik ifadələrin işlənməsi İctimai Televiziyanın tamaşaçı auditoriyası tərəfindən də birmənalı şəkildə pislənilir. Bunu İTV-nin elektron poçtuna gələn məktublar və tamaşaçı və dinləyici zəngləri də təsdiqləyir.