İcbari Sığorta Bürosunun (İSB) nümayəndə heyəti Almaniyada “Yaşıl kart” (Green Card) sisteminə qoşulma məsələlərini müzakirə edib. Bu barədə İSB-nin məlumatında qeyd edilir.
Azərbaycan nümayəndə heyəti 20-24 oktyabr tarixlərində Baden-Baden şəhərində olub və burada İSB-nin Green Card sisteminə qoşulması çərçivəsində müzakirələr aparıb.
““Yaşıl Kart” sisteminin idarəedici təşkilatı olan Bürolar Şurasında keçirilən görüşdə təkrar sığorta proqramı və bank qarantiyası, Azərbaycan qanunvericiliyə dəyişikliklər, sistemə qoşulma ilə bağlı hazırlıq işlərinin cari statusu və s. məsələlər müzakirə olunub”, - deyə məlumatda vurğulanır.
Daha əvvəl Maliyyə Nazirliyinin Dövlət Sığorta Nəzarəti Xidmətinin rəisi Namiq Xəlilova istinadən məlumat verilib ki, Azərbaycan 2015-ci ildə “Yaşıl kart” (Green Card) sisteminin üzvü ola bilər.
Green Card avtonəqliyyat vasitəsi sahiblərinin mülki məsuliyyətinin sığortası şəhadətnaməsinin bu sistemin iştirakçıları olan ölkələr arasında qarşılıqlı tanınması haqqında sazişdir.
1949-cu ildə Londonda avtomobil sığortaçılarının beynəlxalq konfransında BMT-nin İqtisadi və Sosial Şurasının tövsiyələri qəbul edilib və rəsmi olaraq mənzil-qərargahı Londonda yerləşən Büro Şurasının əsası qoyulub. 1951-ci ildə Büro Şurasının birinci rəsmi toplantısı baş tutub. Toplantıda sistemə üzv ölkələrin milli büroları arasında sazişin modeli razılaşdırılıb və “Yaşıl kart”lar üçün vahid standartlar qəbul edilib . “Yaşıl kart”a dair saziş 1953-cü il yanvarın 1-dən qüvvəyə minib. Sazişə əsasən, üzv ölkələrin hər biri tərəfindən verilmiş avtonəqliyyat vasitəsi sahiblərinin mülki məsuliyyətinin sığorta şəhadətnaməsi həmin sazişin iştirakçısı olan digər dövlətlərin ərazisində etibarlı sayılır.
Hazırda “Yaşıl kart” sisteminə Avropa, Asiya və Afrikanın 46 ölkəsi qoşulub. 2006-cı ildə Büro Şurasının mənzil-qərargahı Brüsselə köçürülüb.
İcbari Sığorta Bürosu “İcbari sığortalar haqqında” qanun çərçivəsində yaradılıb.
Hazırda Azərbaycanda fəaliyyət göstərən 12 sığorta şirkəti İSB-nin üzvüdür.