“BP-Azerbaijan” şirkəti (“Şahdəniz” layihəsinin texniki operatoru) “Şahdəniz” yatağının işlənməsi üzrə “Mərhələ-2” çərçivəsində tikinti işlərinə başlayıb. Bu barədə BP şirkətinin Azərbaycan, Gürcüstan və Türkiyə üzrə regional prezidenti Qordon Birrel çərşənbə günü mətbuat konfransında bəyan edib.
“Səngəçal terminalında “Mərhələ-2” üzrə ilkin tikinti işlərinə başlanılıb. Bundan başqa, “Mərhələ-2” üçün infrastrukturun genişləndirilməsi ilə əlaqədar Gürcüstanda müəyyən əmlak məsələri həll olunmağa başlayıb”, - deyə Q.Birrel bildirib.
“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları BP (operator – 28,8%), “Statoil” (15%), SOCAR (16,7%), “LUKOIL” (10%), NICO (10%), “Total” (10%) və TPAO (9%) şirkətləridir.
Şahdəniz” yatağının işlənməsi layihəsinin səhmdarları 2013-cü il dekabrın 17-də Bakıda “Şahdəniz” layihəsinin ikinci mərhələsi üzrə yekun investisiya qərarını imzalayıblar.
“Mərhələ-2” $28 mlrd. məbləğində qiymətləndirilir. Hasilatın illik həcmi 16 mlrd. kubmetr qaz təşkil edəcək. Bunun 10 mlrd. kubmetri Avropa, 6 mlrd. kubmetri isə Türkiyənin qərb regionlarına nəql olunacaq. Azərbaycan qazının Avropaya nəqlinə 2019-cu ildə başlanılacaq.
“Mərhələ-2” layihəsi iki yeni platformanın tikintisini, 26 sualtı quyunun qazılmasını və 550 metr dərinlikdə 500 kilometrlik sualtı boru kəmərlərinin çəkilməsini, Səngəçal terminalının genişləndirilməsini, Cənubi Qafqaz boru kəməri magistralının ötürmə qabiliyyətinin 16 mlrd. kubmetrə qədər artırılmasını və qazın Avropaya nəqli üçün 4000 kilometrə qədər uzunluqda yeni qaz kəmərlərinin tikintisini nəzərdə tutur.