Ağdam rayonunda məcburi köçkünlər üçün salınan qəsəbədə tikinti işləri iyulun sonunadək başa çatdırılacaq. Bu barədə rəsmi KİV-lər məlumat verir.
Cümə günü baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov məcburi köçkünlər üçün salınan yeni qəsəbədə tikinti işlərinin gedişi ilə bağlı vəziyyəti öyrənmək məqsədi ilə Ağdam rayonunda olub.
Qeyd olunub ki, prezident İlham Əliyevin 1 iyul 2004-cü il tarixli sərəncamı ilə təsdiq olunmuş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na uyğun olaraq salınan 632 evdən ibarət qəsəbənin inşası üçün 70 hektar torpaq sahəsi ayrılıb.
Qəsəbədə 50 bir otaqlı, 296 ikiotaqlı, 242 üçotaqlı, 44 dördotaqlı mənzillərdən ibarət binalar, həmçinin 440 şagird yerlik məktəb binası, 50 yerlik uşaq bağçası, inzibati bina, klub icma mərkəzi, həkim məntəqəsi, poçt binası inşa edilmiş, su və qaz çəkilişi başa çatıb. Hazırda qəsəbədəki küçələr asfaltlanır.
Ə.Həsənov tikinti işlərinin gedişi ilə bağlı real vəziyyəti öyrənmək məqsədi ilə iyulun 4-də Mingəçevir şəhərində məcburi köçkünlər üçün salınan yeni məhəllədə də olub.
Ə.Həsənova məlumat verilib ki, layihəyə uyğun olaraq hazırda ərazidə 11 ədəd 9 mərtəbəli, 594 mənzilli binalar tikilir. Binalarda 36 ədəd 1 otaqlı, 288 ədəd 2 otaqlı, 234 ədəd 3 otaqlı, 36 ədəd isə 4 otaqlı mənzillər nəzərdə tutulur.
Bundan əlavə, ərazidə 480 şagird yerlik məktəb binası, 140 yerlik uşaq bağçası, tibb məntəqəsi, ATS binası və klub-icma mərkəzi üçün binaların tikintisi də davam etdirilir.
Müşavirədə çıxış edən komitə sədri bildirib ki, hazırda Dövlət Proqramına uyğun olaraq Mingəçevir, Bərdə, Ağdam, Göygöl, Qaradağ, Beyləqan, Saatlı və Hacıqabul rayonlarının ərazilərində məcburi köçkün ailələri üçün qəsəbə və məhəllələr inşa edilir.
R.Babayev