Prezident İlham Əliyev və Almaniyanın xarici işlər üzrə federal naziri Frank-Valter Ştaynmayer Berlində Azərbaycanla Almaniya arasında ikitərəfli münasibətlərin hazırkı vəziyyəti və perspektivlərinə dair fikir mübadiləsi aparıblar. Bu barədə dövlət başçısının saytında məlumat verilir.
Görüş zamanı tərəflər, həmçinin Dağlıq Qarabağ münaqişəsini müzakirə ediblər.
Həmin gün İ.Əliyev Münhen Beynəlxalq Təhlükəsizlik Konfransının sədri Volfqanq Fredrik İşinger ilə görüşüb.
Görüşdə Münhen Beynəlxalq Təhlükəsizlik Konfransının regional təhlükəsizliyə və beynəlxalq əməkdaşlığa töhfə verdiyi qeyd olunub, digər məsələlər ətrafında fikir mübadiləsi aparılıb.
Bundan başqa, dövlət başçısı Almaniya-Azərbaycan Forumunun üzvləri, Almaniya Bundestaqının Xristian Demokratlar və Xristian Sosialistlər, Sosial Demokratlar və Yaşıllar partiyalarından olan deputatları, Bundestaqda fəaliyyət göstərən komitələrin rəhbərləri və üzvləri ilə də görüşüb.
Görüşdə Azərbaycan ilə Almaniya arasında siyasi, iqtisadi, mədəniyyət, elm və digər sahələrdə əməkdaşlığın hazırkı vəziyyəti və perspektivləri ilə bağlı səmərəli fikir mübadiləsinin aparılması baxımından bu görüşün əhəmiyyəti vurğulanıb.
İ.Əliyev göüş iştirakçılarına Dağlıq Qarabağ münaqişəsinin nizamlanmasına dair Azərbaycanın mövqeyi barədə ətraflı məlumat verib. Dövlət başçısı münaqişənin beynəlxalq hüququn norma və prinsipləri əsasında, Azərbaycanın ərazi bütövlüyü çərçivəsində həllinin vacibliyini vurğulayıb.
Görüşdə, həmçinin Azərbaycan ilə Almaniya arasında energetika sahəsində əməkdaşlıq, iqtisadi əlaqələr, informasiya texnologiyaları, tibb sahəsində əməkdaşlıq, yeni alman şirkətlərinin Azərbaycan iqtisadiyyatında iştirakı müzakirə olunub.
Bundan başqa, parlamentlərarası əlaqələr, beynəlxalq təşkilatlar çərçivəsində, o cümlədən Avropa Şurası və Avropa İttifaqında əməkdaşlıq, “Şərq tərəfdaşlığı” Proqramında iştirakla bağlı məsələlər ətrafında geniş fikir mübadiləsi aparılıb.
F.İsazadə