Benilüks Azərbaycanlılar Konqresi dünya birliyini Xocalı soyqırımını tanımağa və bu qanlı aksiyanın günahkarlarının ədalət məhkəməsinə cağırılmasının təmin edilməsinə çağırıb.
Diasporla İş üzrə Dövlət Komitəsinin mətbuat xidmətindən verilən məlumata görə, bu barədə Benilüks Azərbaycanlılar Konqresinin Xocalı soyqırımının 23-cü ildönümü ilə əlaqədar Avropa İnsitutlarının rəhbərlərinə və Avropa Parlamentinin 751 millət vəkilinə ünvanlanmış bəyannaməsində deyilir.
Sənədin müəllifləri Avropa parlamentlərinin, beynəlxalq təşkilatların və dünya ictimaiyyətinin diqqətinə çatdırırlar ki, Xocalı soyqırımı bəşəriyyətə qarşı törədilən ən qanlı cinayətlərdən biridir.
“Bir gecədə şəhərin əksəriyyəti yaşlı, uşaq və qadın olan 613 dinc sakininin vəhşiliklə qətlə yetirilməsi XX əsrin ən dəhşətli faciəsidir”, - deyə bəyanatda qeyd edilir.
Bəyannamə müəllifləri, həmçinin Avropanın beynəlxalq təşkilatlarını və parlamentariləri öz nüfuzundan istifadə edərək bir milyon azərbaycanlı məcburi köçkün və qaçqının öz torpağına təhlükəsiz qayıtmasını təmin etməyə çağırıb.
Bəyannamə Avropa Parlamenti, Avropa Komissiyası və Avropa Şurasının prezidentlərinə, Birləşmiş Millətlər Təşkilatı, “Amnesty İnternational”, “Human RightsWatch” təşkilatlarına, Niderland, Belçika və Lüksemburq parlamentlərinə göndərilib.
Xocalı şəhərində dinc sakinlərin kütləvi qətlə yetirilməsi Qarabağ müharibəsinin ən faciəli hadisələrindən biridir. 1992-ci il fevralın 25-dən 26-na keçən gecə erməni silahlı birləşmələri keçmiş SSRİ-nin Xankəndi şəhərində yerləşdirilmiş 366-cı motoatıcı alayının ağır texnika və şəxsi heyətinin dəstəyi ilə Xocalını zəbt ediblər. İndiyədək görünməmiş qəddarlıq nəticəsində 613 nəfər qətlə yetirilib, onlardan 106 nəfəri qadın, 63-ü azyaşlı uşaq, 70-i qocalardır, 8 ailə tamamilə məhv edilib, 487 nəfər əlil olub, 1275 nəfər əsir götürülüb, 150 nəfər isə itkin düşüb.
R.Babayev