Əmlak Məsələləri Dövlət Komitəsi (ƏMDK) dəmir-beton məhsullarının istehsalı ilə məşğul olan “Sabirabad Dəmir Beton” SC-nin səhmlərinin 99,92%-nin satışı üzrə təkrar investisiya müsabiqəsi elan edib. Bu barədə “İnterfaks- Azərbaycan” agentliyinə Dövlət Komitəsindən məlumat verilib.
Elana əsasən, hər birinin nominal dəyəri 2 manata bərabər olan 410,237 min ədəd səhmin satışı üzrə müsabiqədə həm yerli, həm də xarici investorlar iştirak edə bilərlər.
Müsabiqə iştirakçılarının hazırladığı investisiya proqramı yüksək keyfiyyətli beton və (və ya) dəmir-beton məhsullarının istehsalına yönəldilməlidir. Proqrama, həmçinin bu istehsalın təşkili, müəssisəsnin ərazisində bina və tikililərin bərpası, müəssisənin infrastrukturunun yaxşılaşdırılması və ərazinin abadlaşdırılması, yeni iş yerlərinin açılması və əməkdaşların sosial təminatına dair təkliflər daxil olmalıdır.
Müsabiqənin qalibi səhmlərə görə dövlət büdcəsinə ən azı 490 min manat köçürməlidir.
Qaliblə səhmlərin alqı-satqısı haqqında müqavilə müsabiqənin nəticələri təsdiqləndiyi andan etibarən 30 gündən gec olmayaraq imzlanmalıdır. Müqavilə imzalandıqdan sonra müsabiqənin qalibi investisiyanın elan olunmuş həcminin 5%-ni 60 gün ərzində SC-nin hesabına, müsabiqə təklifində səhmlərə görə nəzərdə tutulan vəsaiti 90 gün ərzində dövlət büdcəsinə köçürməlidir.
Müsabiqə üzrə təkliflər 2015-ci il aprelin 14-nə qədər qəbul ediləcək. Təkliflər aprelin 15-də qiymətləndiriləcək.
“Sabirabad Dəmir Beton” SC Sabirabad rayonunun Qalaqayın kəndində yerləşir. Hazırda müəssisədə 9 nəfər işçi çalışır.
2015-ci il fevralın 1-nə müəssisənin nizamnamə kapitalı 812,108 min manat təşkil edir və bir qiymətli kağızın nominal dəyəri 2 manata bərabər olan 410,554 min ədəd səhmə bölünüb.
2015-ci il fevralın 1-nə SC-nin öhdəlikləri 63,521 min manata, debitor borcları 44,991 min manata bərabərdir.
N.Abbasova