SOCAR (Azərbaycan Respublikası Dövlət Neft Şirkəti, ARDNŞ) Tatarıstan şirkətlərini Azərbaycanda reallaşdırılan layihələrdə iştirak etməyə dəvət edir. Bu barədə SOCAR-ın rəsmi saytında məlumat verilir.
Bazar ertəsi SOCAR-ın prezidenti Rövnəq Abdullayev Tatarıstan Respublikası baş nazirinin müavini, sənaye və ticarət naziri Ravil Zaripov ilə Bakıda ARDNŞ və Tatarıstan şirkətləri arasında əməkdaşlığın inkişaf perspektivlərini müzakirə edib.
2013-cü ildə R.Zaripovun Bakıya son səfərini xatırladan R.Abdullayev həmin görüşdən sonra SOCAR ilə Tatarıstanın neft sektoruna daxil olan iri müəssisə və şirkətlər arasında əməkdaşlığın daha da genşləşdiyini qeyd edib.
ARDNŞ-nin prezidenti Tatarıstanın nümayəndə heyətinə Neft-Qaz Emalı və Neft-Kimya Kompleksi, Heydər Əliyev adına Bakı Neft Emalı Zavodunun modernləşdirilməsi, Sumqayıt Kimya Texnoparkı, “Polimer” zavodunun inşa edilməsi və digər iritutumlu layihələr barədə məlumat verib. O, Azərbaycanda əlverişli investisya mühitinin yaradıldığını vurğulayıb və Tatarıstan şirkətləri ilə səmərəli əməkdaşlıq üçün hər cür şəraitin olduğunu bildirib.
Öz növbəsində R.Zaripov qeyd edib ki, Tatarıstan SOCAR-ın müxtəlif idarə və müəssisələri ilə əməkdaşlıq əlaqələrinin bərpa edilməsində və genişləndirilməsində maraqlıdır.
Görüş zamanı Tatarıstanın neft hasilatı, emal və neft-kimya sənayesinin bugünkü vəziyyəti, eləcə də SOCAR-la mümkün əməkdaşlıq perspektivləri haqqında təqdimatlar keçirilib.
N.Abbasova