I Avropa Oyunlarına həsr edilən şokolad tablosu "Ginnesin rekordlar kitabı"na düşə bilər. Bu barədə “İnterfaks-Azərbaycan” agentliyinə Mədəniyyət və Turizm Nazirliyinin mətbuat xidmətindən məlumat verilib.
Muzey Mərkəzində məşhur şokolad ustası Nikolay Popovun müəllif sərgisində yer alan şokolad tablosunun çəkisi 215 kiloqramdır.
Avropa Oyunları ərəfəsində, mayın 15-də açılan "Nikolya şokolad muzeyi" sərgisini indiyədək 15 min insan ziyarət edib. Bu barədə məlumat verən sərginin təşkilatçısı Andrey Leynin sözlərinə görə, təşkilatçılar dünyanın ən böyük şokolad tablosu haqda "Ginnesin rekordlar kitabı"na müraciət ediblər.
Sərgi Mədəniyyət və Turizm Nazirliyinin və Muzey Mərkəzinin təşkilatçılığı ilə keçirilir.
"Nikolya şokolad muzeyi” dünya turu çərçivəsində 40-dan artıq şəhərdə sərgilənib.
Sərgi iyunun 28-dək davam edəcək.
A.Zeydullayeva