“AGBank” 2006-cı ildən 2015-ci il iyulun 1-nə qədər Azərbaycan İpoteka Fondunun (AİF) vəsaitlərindən 1,376 min ipoteka krediti verib. Bu barədə fondun saytında məlumat verilir.
Məlumata əsasən, hesabat dövründə Azərbaycanda 31 bank AİF-in vəsaitlərindən kreditlər verib.
Verilmiş ipoteka kreditlərinin sayına görə ilk beşliyə “AGBank" (1,376 min kredit, o cümlədən 2015-ci ilin I yarısında 66 kredit), "Bank Standard" (1,303 min kredit, cari ilin yanvar-iyun aylarında 58 kredit), "Xalq Bank" (1,293 min kredit, yanvar-iyun aylarında 28 kredit), “Muğanbank” (1,196 min kredit, I yarımillikdə 107 kredit) və "Dəmirbank" (1,110 min kredit, I yarımillikdə 36 kredit) daxildir.
Daha az fəal bankların beşliyinə isə “Azər-Türk Bank” (28 kredit), "Yapı Kredi Bank” (25), “Azərbaycan Sənaye Bankı" (17), “Rabitəbank” (15), və "Azərbaycan Kredit Bankı" (14) daxildir.
AİF 2005-ci ilin dekabr ayında yaradılıb və 2006-cı ilin martında ipoteka kreditlərinin verilməsinə başlayıb.
Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 30 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.
A.Əzizov