Azərbaycanın mədəniyyət və turizm naziri Əbülfəs Qarayev Rusiya ilə mədəni əlaqələrin yüksək səviyyədə olduğunu bildirib.
“Azərbaycan və Rusiya xalqları arasında mədəni-mənəvi əlaqələrin çox qədim tarixi var. Bu, bizim uzun müddət eyni dövlətin tərkibində yaşamağımızla əlaqədardır”, - deyə Ə.Qarayev Rusiyanın aparıcı KİV nümayəndələri ilə görüşdə bildirib.
Onun sözlərinə görə, əvvəlcə çar Rusiyasının, daha sonra SSRİ-nin tərkibində Rusiya ilə qonşuluq Azərbaycanın bugünkü simasının formalaşmasına ciddi təsir göstərib.
“Bu, dünyagörüşümüzün formalaşmasında da ciddi izlər buraxıb. Və biz dünya mədəniyyəti və musiqisinin Rusiya mədəniyyəti vasitəsi ilə bizə ötürülməsinə görə minnətdarıq”,- deyə Ə.Qarayev qeyd edib.
Nazir bildirib ki, Rusiya ilə mədəni əlaqələr Azərbaycanda Rusiya günlərinin, Rusiyada isə Azəbaycan günlərinin təşkili kimi tədbirlərlə məhdudlaşmayaraq gündəlik həyatımızda da inkişaf edir.
“Hər gün Rusiyanın teatr truppaları, estrada artistləri Azərbaycana qastrola gəlir. Muzey və kitabxana işində biz Rusiya ilə proqramlar həyata keçiririk. Bizim aramızdakı mədəni dialoq kəsilmir, biz daim əlaqə saxlayırıq”,- deyə Ə.Qarayev qeyd edib.
Nazir mədəniyyətlərarası əlaqələrin inkişafının mədəni diplomatiyanın vacib komponenti olduğunu söyləyib.
“Mədəniyyət siyasi uyğunsuzluqları aradan qaldıraraq xalqlar arasında körpülərin qurulmasına, münaqişəli vəziyyətlərin həllinə, xalqların və icmaların yaxınlaşmasına kömək edir”, - deyə nazir qeyd edib.
Ə.Qarayevin sözlərinə görə, Azərbaycanda iki ildə bir dəfə beynəlxalq qlobal forum təşkil edilir ki, Rusiya tərəfi də bu forumun işində fəal iştirak edir.
O, Rusiya ilə turizm sahəsində uğurlu əməkdaşlığın mövcud olduğunu xatırladıb.
“Azərbaycana gələn turistlərin sayına görə Rusiya ikinci və ya üçüncü yeri tutur. Biz bu sahədə böyük layihələr, o cümlədən müalicə turizmi layihəsini həyata keçiririk. Dil maneəsinin olmaması rusiyalı turistlərlə əlaqələri asanlaşdırır və stimullaşdırır”,- deyə nazir qeyd edib.
R.Babayev