Cümə günü axşam “Günəşli” yatağının 10 saylı stasionar dərin dəniz özülündə baş vermiş yanğının söndürülməsinə 5 gəmi cəlb edilib. Bu barədə “Azneft” İstehsalat Birliyinin baş mühəndisi Balamirzə Ağarəhimov bazar günü mətbuat konfransında söyləyib.
“Yanğınsöndürmə işlərinə 5 gəmi cəlb edilib. Lakin bu üsulla yanğını 100% söndürmək mümkün olmayacaq. Çünki gəmilər platformadan uzaqdadır. Buna görə də mövcud su kəmərini işə salmaq üçün dəniz özülündə iş aparılır ki, nəticədə yanğınsöndürmə işlərində effektivliyə nail olmaq mümkün olacaq”,- deyə B.Ağarəhimov qeyd edib.
Onun sözlərinə görə, hazırda dənizdə küləyin orta sürəti saniyədə 12-17 metr təşkil edir, bəzən küləyin sürəti saniyədə 20-23 metrə çatır.
Xəbər verildiyi kimi, cümə günü saat 17.40 radələrində nəhəng dalğalar Azərbaycan Respublikası Dövlət Neft Şirkətinin “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusunu qırmış, nəticədə boru kəmərini zədələmiş və şiddətli yanğın baş vermişdir. Əlverişsiz hava şəraiti xilasedici gəmilərin özülə yaxınlaşmasına imkan verməyib.
Azərbaycan Respublikasının Prezidenti İlham Əliyev “Günəşli” yatağının 10 saylı stasionar dərin dəniz özülündə baş vermiş qəza ilə əlaqədar Dövlət Komissiyasının yaradılması haqqında Sərəncam imzalayıb. Komissiya qarşısında xilasetmə işlərinin və itkin düşənlərin axtarışının sürətləndirilməsi, hadisənin baş vermə səbəblərinin araşdırılması və baş vermiş faciənin nəticələrinin aradan qaldırılması vəzifəsi qoyulub. Baş nazir Artur Rasizadə komissiyanın sədri təyin edilib. Komissiyanın tərkibinə 11 nazirlik və dövlət strukturunun rəhbərləri daxil edilib.
Bundan əlavə, platformadakı qəza faktı ilə əlaqədar Azərbaycan Respublikası Cinayət Məcəlləsinin 225.2-ci maddəsi (Yanğın təhlükəsizliyi qaydalarını pozma ağır nəticələrə səbəb olduqda) ilə cinayət işi qaldırılıb.
Xilasetmə işləri çərçivəsində 33 nəfər xilas edilib, 1 nəfər həlak olub, 29 nəfər itkin düşüb.
Dekabrın 6-da Azərbaycanda matəm elan edilib.
A.Əzizov