Azərbaycan İpoteka Fondu (AİF) cümə axşamı hərracda 4 mln. manatlıq istiqraz yerləşdirib. Bu barədə Bakı Fond Birjasının məlumatında deyilir.
Bu, fondun doqquzuncu emissiyadan olan istiqrazlarının on birinci və sonuncu yerləşdirilməsidir.
Hərracda bir investor iştirak edib. İstiqrazlar 101,2333% qiyməti ilə yerləşdirilib.
2009-2015-ci illərdə AİF 9 hərrac çərçivəsində 390 mln. manat məbləğində istiqraz yerləşdirib.
Xəbər verildiyi kimi, 30 dekabr 2014-cü il tarixində Qiymətli Kağızlar üzrə Dövlət Komitəsi AİF-in 50 mln. manat məbləğində istiqrazlarının doqquzuncu emissiya prospektini qeydiyyata alıb. Emissiya nominal dəyəri 1 min manat olan 50 min ədəd təmin edilmiş istiqraza bölünüb, istiqrazların tədavül müddəti 10 il, illik faiz dərəcəsi 3% təşkil edir.
AİF 2005-ci ilin dekabr ayında yaradılıb və 2006-cı ilin martında ipoteka kreditlərinin verilməsinə başlayıb. Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 32 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.
A.Əzizov