Bu gün SOCAR (Azərbaycan Dövlət Neft Şirkəti, ARDNŞ) dekabrın 4-də “Günəşli” və “Neft Daşları” yataqlarında baş vermiş qəza nəticəsində itkin düşmüş neftçilərin ailələrinə birdəfəlik maddi yardımın verilməsini başa çatdırıb. Bu barədə şirkətin məlumatında deyilir.
Maliyyə Nazirliyinin köçürdüyü vəsait, eləcə də həmin gün “Neft Daşları”ndakı 501 saylı özüldə baş vermiş qəzada itkin düşən üç nəfər neftçinin ailəsinə SOCAR tərəfindən ayrılmış 15 000 manat məbləğində birdəfəlik maddi yardımlar şirkətin “Azneft” İstehsalat Birliyi, “Neftqaztikinti” Tresti, Kompleks Qazma İşləri Tresti, Dalğıc və Qəza-Xilasetmə İşləri İdarəsi, Nəqliyyat İdarəsi, həmçinin digər idarə və müəssisələrindən olan neftçilərin ailə üzvlərinə təqdim olunub.
Dekabrın 4-də saat 17.40 radələrində güclü tufan nəticəsində “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılıb, boru kəməri zədələnib və yanğın baş verib. Əlverişsiz hava şəraiti xilasedici gəmilərin özülə yaxınlaşmasına imkan verməyib. Xilasetmə işləri çərçivəsində 33 nəfər xilas edilib, 8 nəfərin cəsədləri tapılıb və şəxsiyyəti müəyəyn edilib, 22 nəfərin axtarışları davam etdirilir.
Xəbər verildiyi kimi, dekabrın 4-də təbii fəlakət nəticəsində “Günəşli” yatağındakı 10 saylı dərin dəniz özülündə baş vermiş qəza zamanı həlak olan və itkin düşən SOCAR əməkdaşlarının hər birinin ailəsinə dövlət tərəfindən 15 000 (on beş min) manat məbləğində birdəfəlik maddi yardım ödənilməsi qərara alınıb.
Həmin gün “Neft Daşları”ndakı 501 saylı özüldə baş vermiş qəzada itkin düşən üç nəfər neftçinin ailəsinə isə SOCAR tərəfindən 15 min manat məbləğində birdəfəlik yardım ayrılıb.
Bundan başqa, şirkət yuxarıda qeyd olunan neftçilərin ailələrinə 5 min manat məbləğində birdəfəlik maddi yardım ayıracaq.
N.Abbasova