Dünən “Kapelhaus” Alman-Azərbaycan Mədəniyyət Mərkəzində Rus Pravoslav Kilsəsinin Bakı və Azərbaycan Yeparxiyası tərəfindən təşkil edilmiş ənənəvi Milad konserti keçirilib. Bu barədə “İnterfaks-Azərbaycan” agentliyinin müxbiri tədbirdən məlumat verib.
Tədbirdə çıxış edən Bakı və Azərbaycanın arxiyepiskopu Aleksandr Ata bütün konsert iştirakçılarına minnətdarlığını bildirib.
O söyləyib ki, konsertə toplaşanlar müxtəlif cins, yaş, millət, siyasi əqidə, dini etiqad nümayəndələri olmalarına baxmayaraq, “biz hamımız Tanrının övladlarıyıq və Tanrı bizə bir vahid dil verib. Bu dil musiqi dilidir”.
“Qədim kilsə slavyan, rus, Azərbaycan və italyan dillərində dini mahnılar səsləndiriləcək. Bütün bunları bizim həyatımızda son dövrlər geniş istifadə edilən bir sözlə ifadə etmək olar - multikulturalizm”, - deyə Aleksandr Ata söyləyib.
Yeparxiya rəhbərinin sözlərinə görə, əhalisinin əksəriyyəti müsəlmanlar olan Azərbaycanda xristian, yəhudi və digər din və millətlərdən olan insanlar rahat yaşayırlar.
“Biz həmişə öz bayramlarımızı birlikdə qeyd edirik. Biz bütün dinlərin nümayəndələrinin qeyd etdikləri bayramları bilirik, onları birlikdə qarşılayır və sevinirik. Buna görə bugünkü bayram bizim ölkəmizin, xalqımızın multikulturalizm ənənələrinin təzahürüdür”- deyə arxiyepiskop bildirib.
Konsertdə yerli ictimaiyyət nümayəndələri ilə yanaşı , Azərbaycanda akkreditasiya olunmuş diplomatik korpusların nümayəndələri, Rusiya səfiri Vladimir Doroxin, Ukrana səfiri Aleksandr Mişenko, ABŞ səfiri Robert Sekuta, İsrail səfiri Dan Stan, Almaniya səfiri Haydrun Tempel, Rumıniya səfiri Daniel Kristian Çobanu, Qırğızıstan səfiri Ayciqit Buranov və başqaları iştirak ediblər.
Qonaqlar arasında Azərbaycanın müsəlman və yəhudi icmalarının nümayəndələri də olub.
Tədbirdə Müqəddəs Məryəm Ana kilsəsinin bazar günü məktəbinin gənc ifaçıları, qadınlardan ibarət kilsə xoru, Mixaylo-Arxangelsk məbədinin və Müqəddəs Məryəm Ana kilsəsinin xorları, Azərbaycanın əməkdar artistləri, Bakı Musiqi Akademiyasının tələbələri çıxış ediblər.
F.İsazadə