“Gəncəbank” ASC Azərbaycan İpoteka Fondunun (AİF) agent bankları sırasından çıxarılıb. Bu barədə “İnterfaks-Azərbaycan” agentliyinə fonddan məlumat verilib.
Xəbər verildiyi kimi, yanvarın 22-də Azərbaycan Mərkəzi Bankı (AMB) “Gəncəbank” ASC-nin bank lisenziyasını ləğv edib. Bu qərar bank tərəfindən məcmu kapitalın minimum məbləği tələbinə (50 mln. manat - İF-Az) əməl olunmaması, kreditorlar qarşısında öhdəliklərini icra edə bilməməsi, cari fəaliyyətini etibarlı və prudensial qaydada idarə etməməsinə görə qəbul edilib.
“Beləliklə, agent bankların sayı 30-dək azalıb”, - deyə fonddan qeyd ediblər.
AİF 2005-ci ilin dekabr ayında yaradılıb və 2006-cı ilin martında ipoteka kreditlərinin verilməsinə başlayıb.
Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 30 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.
“Gəncəbank” ASC 1994-cü ildə yaradılıb. Hazırda bankın səhmdarları 4 fiziki şəxsdir.
A.Əzizov