Fevralın 27-də Azərbaycan Dövlət Akademik Opera və Balet Teatrında Cakomo Puççininin “Toska” operasının nümayişi olacaq. Bu barədə “İnterfaks-Azərbaycan” agentliyinə teatrdan məlumat verilib.
Toskanın partiyasını İstanbul Opera və Balet Teatrının aparıcı solisti, Vokalçıların Bülbül adına VI Beynəlxalq müsabiqəsinin Qran-Pri mükafatının sahibi Dəniz Yetim, Kavaradossinin partiyasını əməkdar artist, Prezident təqaüdçüsü Fərid Əliyev, Skarpia partiyasını Belarus Milli Akademik Böyük Opera və Balet Teatrının aparıcı solisti, Belarusun əməkdar artisti, vokalçıların beynəlxalq müsabiqələr laureatı Vladimir Qromov ifa edəcək.
Tamaşada Azərbaycanın xalq artisti Əli Əsgərov, respublikanın əməkdar artistləri Əkrəm Poladov və Cahangir Qurbanov da iştirak edəcəklər.
Operanın dirijoru Azərbaycanın xalq artisti, Dövlət mükafatı laureatı, professor Rauf Abdullayevdir.
A.Zeydullayeva