“NBC Bank” ASC Azərbaycan İpoteka Fondunun (AİF) agent bankı statusunu bərpa edib. Bu barədə “İnterfaks-Azərbaycan” agentliyinə fonddan məlumat verilib.
Xəbər verildiyi kimi, 2016-cı il yanvarın sonunda “NBC Bank” ASC AİF-in agent bankları sırasından çıxarılıb. Yanvarın 25-də Azərbaycan Mərkəzi Bankı (AMB) “NBC Bank” ASC-nin lisenziyasını ləğv edib. Lakin AMB mövcud nöqsanların aradan qaldırılması ilə əlaqədar fevralın 2-də “NBC Bank”ın lisenziyasının bərpa olunmasına dair qərar qəbul edib.
“Bunun əsasında “NBC Bank” yenidən AİF-in agent bankı olub. Beləliklə, agent bankların sayı 28-dək artıb”, - deyə məlumatda qeyd edilir.
AİF 2005-ci ilin dekabr ayında yaradılıb və 2006-cı ilin martında ipoteka kreditlərinin verilməsinə başlayıb.
Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 30 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 50 min manat təşkil edir, illik faiz dərəcəsi 4%-dən çox deyil.
“NBC Bank” 1992-ci ilin dekabr ayında “Ruzu bank” kimi təsis edilib. 2003-cü ilin yanvar ayında bankın adı dəyişdirilərək “NBC Bank” adlandırılıb.
A.Əzizov