“Azərbaycan Dəmir Yolları” QSC, “Rusiya Dəmir Yolları” ASC və İran Dəmir Yolları “Cənub-Şərq” nəqliyyat dəhlizinin gələcək inkişafı haqqında üçtərəfli saziş imzalayıblar. Bu barədə Rusiya KİV-ləri xəbər verir.
Sənəd Soçidə “Strateji tərəfdaşlıq 1520” beynəlxalq biznes forumu çərçivəsində imzalanıb.
Sazişə yük axınının cəlb edilməsi və “Şimal-Cənub” beynəlxalq nəqliyyat dəhlizinin gələcək inkişafı üçün dəmir yolu tariflərinə dair müddəalar, o cümlədən Bəndər-Abbas-Moskva təcrübə konteyner qatarının təşkili daxildir.
"Yüklərin çatdırılma xərcləri və müddətini azaltmaq, eləcə də “Şimal-Cənub” istiqamətinin cəlbediciliyini artırmaq üçün konteyner yüklərinin bu dəhlizin “qərb qolu” ilə Azərbaycan ərazisindən keçməsi məqsədəuyğundur.
Mart ayında Bakıda “RJD Logistika”, “TransKonteyner” və “ADY Express” şirkətlərinin iştirakı ilə Rusiya, Azərbaycan və İran dəmir yollarının nümayəndələrinin üçtərəfli görüşündə Hindistan-İran-Rusiya multimodal marşrutu təsdiq edilib. Bu marşrutla konteyner yüklərinin müntəzəm daşınmasının təşkili nəzərdə tutulur.
İran ərazisi ilə Bəndər-Abbas limanından Astara sərhəd keçid məntəqəsinə qədər nəql dəmir yolu (Bəndər-Abbas-Qəzvin) və avtomobil nəqliyyatı (Qəzvin-Astara) vasitəsilə həyata keçiriləcək.
Hazırda tərəflər bu marşrutla sınaq daşımalarının həyata keçirilməsi üçün potensial yük bazasını öyrənir.
A.Əzizov