Ermənilər tərəfindən dövlət sərhədinin Tovuz rayonu sahəsinə, qoşunların qarşıdurma xəttinə yaxın əraziyə pilotsuz uçan aparat (PUA) vasitəsilə kustar üsulla hazırlanan partlayıcı qurğu atılıb. Bu barədə Müdafiə Nazirliyindən məlumat verilib.
Nazirlikdə əmindilər ki, bu növbəti təxribat Ermənistan-Azərbaycan dövlət sərhədində gərginliyin artırılmasına yönəlib.
“Bu cür mənşəyi və mənsubiyyəti məlum olmayan qeyri-ənənəvi üsulla hazırlanan partlayıcı vasitələrin düşmən tərəfindən tətbiqi müdafiənin ön xəttində yerləşən bölmələrimizin şəxsi heyətinə, xüsusilə də həmsərhəd ərazilərdəki yaşayış məntəqələrinin dinc əhalisinə xəsarət yetirmək məqsədi güdür”, - deyə məlumatda deyilir.
Qeyd olunur ki, partlayıcı qurğunun zərərsizləşdirildikdən sonra ilkin öyrənilməsi zamanı bu vasitənin elektrik detonatoru, detonasiya qaytanı, çoxlu sayda metal qəlpələr və qurğunun işə salınması üçün batareyalardan ibarət olduğu müəyyənləşdirilib.
“Beynəlxalq normativ-hüquqi qaydalarla istifadəsi qadağan olunan bu cür vasitələrin Ermənistan tərəfindən, xüsusilə Azərbaycan-Ermənistan dövlət sərhədində məqsədyönlü şəkildə tətbiqi vəziyyəti gərginləşdirmək, Azərbaycanı cavab tədbirləri görməyə təhrik etmək və bununla da təmsil olunduğu hərbi-siyasi blokun digər üzvlərinin diqqətini növbəti dəfə cidd-cəhdlə münaqişəyə cəlb etmək niyyəti daşıyır”, - deyə nazirlik vurğulayıb.
Müdafiə Nazirliyi bildirir ki, “baş verə biləcək hər hansı insidentə və onun nəticələrinə görə məsuliyyət bütünlüklə Ermənistanın kriminal hərbi-siyasi rejiminin üzərinə düşür”.**
F.İsazadə