Azərbaycan beynəlxalq təşkilatları 2016-cı ilin dekabrında erməni təxribatının qarşısını alarkən həlak olmuş hərbçi Çingiz Qurbanovun meyitinin qaytarılması ilə bağlı Ermənistana təzyiq göstərmyə çağırıb.
Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri, Dövlət Təhlükəsizliyi Xidmətinin rəisi, general-leytenant Mədət Quliyev Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri xanım Elena Aymone Sessera ilə görüşüb.
«Dövlət Komissiyası müvafiq beynəlxalq təşkilatları Ermənistana təzyiq göstərməyə və əsgər Çingiz Qurbanovun meyitinin Azərbaycana qaytarılmasını tələb etməyə çağırır», - deyə M.Quliyev bildirib.
O vurğulayıb ki, Ermənistan əvvəllər də belə hallara yol verib və meyitləri uzun müddət saxlamaq kimi qeyri-humanist hərəkət bu ölkə tərəfindən artıq tendensiyaya çevrilib.
M.Quliyev bildirib ki, Dövlət Komissiyası Çingiz Qurbanovun meyitinin qaytarılması ilə bağlı BQXK-nın və ATƏT-in Minsk qrupu həmsədrlərinin səylərini yüksək qiymətləndirir.
“Eyni zamanda, meyitlərin verilməsi mexanizminin və prosedurlarının kifayət qədər aydın və açıq olmasına baxmayaraq, əsgərimizin meyitinin bu günə kimi qaytarılmaması Ermənistan tərəfindən beynəlxalq humanitar hüquq normalarının, insan hüquqlarının, həmçinin Ermənistanın özünün də qoşulduğu 12 avqust 1949-cu il tarixli Cenevrə Konvensiyalarının öhdəliklərinin kobud şəkildə pozulmasıdır”, - deyə komissiyanın sədri əlavə edib.
E.Sessera BQXK-nın Azərbaycandakı nümayəndəliyinin Çingiz Qurbanovun meyitinin tezliklə geri qaytarılması üçün BQXK-nın Ermənistandakı nümayəndəliyi ilə birlikdə səylərini davam etdirdiyini söyləyib.*
R.Babayev