Maliyyə Bazarlarına Nəzarət Palatası Azərbaycan İpoteka Fondunun 10 mln. manat məbləğində istiqraz emissiya prospektini qeydiyyata alıb. Bu barədə Palatadan məlumat verilib.
“Yanvarın 17-də MBNP bir qiymətli kağız üçün nominalı 1 min manat olan cəmiyyətin 10 min ipoteka istiqrazının emissiya prospektini qeydiyyata alıb”, - deyə Palatadan bildiriblər.
İstiqrazların tədavül müddəti 3,6 min gün. gəlirlilik - illik 3% təşkil edir.
AİF 2005-ci ilin dekabrında yaradılıb və 2006-cı ilin martında ipoteka kreditlərinin verilməsinə başlayıb. Azərbaycanda sosial ipotekanın verilməsinə 2007-ci ildən başlanılıb və 6 ay davam edib. AİF 2009-cu il iyunun 1-dən 30 agent bank vasitəsilə kommersiya şərtləri ilə ipoteka kreditlərinin verilməsi prosesini bərpa edib. Kommersiya şərtləri ilə ipoteka kreditləri dövlət büdcəsi vəsaitlərinin hesabına deyil, fondun öz istiqrazlarını buraxmasından cəlb etdiyi vəsaitlər hesabına verilir.
Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 50 min manatı keçməməlidir. Kredit illik 8%-dən çox olmayan dərəcə ilə verilir.
Dövlət büdcəsindən yalnız sosial ipoteka maliyyələşdirilir. Onun maksimal məbləği 100 min manat təşkil edir, illik faiz dərəcəsi 4%-dən çox deyil. **
A.Əzizov