Azərbaycan hökuməti 50 ədəd lokomotivin alınması məqsədilə “Societe Generale”, “BNP Paribas” və Fransanın “HSBC Bank”ından 276,995 mln. avro məbl\ğində kredit cəlb edir. Bu barədə “İnterfaks-Azərbaycan” agentliyinə hökumətdən məlumat verilib.
“Ötən il Azərbaycan hökuməti ilə “Societe Generale”, “BNP Paribas” və “HSBC Bankı”nın Fransa filialı ilə arasında «50 ədəd lokomotivin alınması» layihəsi üzrə 276 mln. 995 min avro dəyərində kredit sazişi imzalanıb”, - deyə hökumətdən qeyd ediblər.
Azərbaycan hökuməti həmin lokomotivləri Bakı-Tbilisi-Qars dəmir yolunda istifadəyə buraxmağı planlaşdırır.
Bundan başqa, Azərbaycan hökuməti "Societe Generale" Bankından 151 ədəd «İveco Urban Way» markalı avtobusların alınması məqsədilə 32,205 mln. avro məbləğində kredit cəlb edir. Bu kredit üzrə saziş artıq imzalanıb”, - deyə hökumətdən vurğulanıb.
2007-ci il fevralın 7-də Gürcüstan, Azərbaycan və Türkiyə Tbilisi- Bakı dəmir yolu magistralından istifadə etməklə Bakı-Tbilisi- Qars dəmir yolu dəhlizinin yaradılmasına dair hökumətlərarası saziş imzalayıblar. Layihə uzunluğu 98 km olmaqla 68 km-i Türkiyə, 30 km-i Gürcüstan ərazisindən keçən Qars-Axalkalaki dəmir yolunun tikintisini nəzərdə tutur. Həmçinin, Axalkalaki-Tbilisi dəmir yolunun 183 kilometrlik hissəsinin yenidən qurulması nəzərdə tutulur.
Gürcüstan hissəsinin tikintisi Azərbaycan tərəfindən maliyyələşdirilir. Azərbaycan Gürcüstana ümumi məbləği $775 mln. təşkil edən iki güzəştli kredit ayırıb.
Bakı-Tbilisi -Qars dəmir yolu 2017-ci ilin birinci rübündə istifadəyə veriləcək.
İlkin mərhələdə bu dəmir yolu ilə ildə 5 mln. ton səviyyəsində yük daşınması nəzərdə tutulub. Gələcəkdə bu həcmin ildə 15-17 mln. tona çatdırılması gözlənilir.
“Azərbaycan Dəmir Yolları” QSC 2014-cü ildə Fransanın “Alstom” şirkəti ilə 50 yük lokomotivinin tədarükünə dair təxminən 300 mln. avro dəyərində müqavilə imzalayıb. **
A.Əzizov