Baş prokuror yanında Korrupsiyaya qarşı Mübarizə Baş İdarəsi 2017-ci ilin ilk yarısında 103 cinayət işi üzrə materialların istintaqını tamamlayaraq, baxılması üçün müvafiq məhkəmələrə göndərib. Bu barədə Baş prokurorun müavini, Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev məlumat verib.
“2017-ci ilin I yarım ili ərzində Baş İdarədə dövlət və özəl sektorda çalışan 133 vəzifəli şəxs barəsində 103 cinayət işinin istintaqı tamamlanaraq baxılması üçün aidiyyəti məhkəmələrə göndərilib”, - K.Əliyev bazar ertəsi mətbuat konfransında bildirib.
Onun sözlərinə görə, həmin cinayət işləri 54 şəxs barəsində 43 iş qulluq mövqeyindən istifadə etməklə mənimsəmə və israf etmə, 34 şəxs barəsində 27 iş qulluq mövqeyindən istifadə etməklə dələduzluq, 19 şəxs barəsində 14 iş vəzifə səlahiyyətlərindən sui-istifadə etmə, 3 şəxs barəsində 2 iş rüşvət alma (passiv rüşvətxorluq) və qalanları digər cinayət faktları ilə əlaqədar olub.
K.Əliyev qeyd edib ki, 2017-ci ilin birinci yarım ili ərzində vətəndaşların 3656 müraciətinə baxılıb, həmçinin 125 cinayət xarakterli material araşdırılıb.
“Həmin materialların 75-i üzrə (60%) cinayət işi başlanıb, 50 material üzrə (40%) digər prokuror təsir aktları tətbiq edilməklə 29 nəfər vəzifəli şəxs intizam məsuliyyətinə cəlb edilib”, - K.Əliyev vurğulayıb.
O qeyd edib ki, məhkəmələrə göndərilmiş cinayət işləri üzrə 12 mln. 804,958 manat ziyanın ibtidai araşdırma mərhələsində 3 mln. 804,958 manat və ya 28,2% ödənilməsi təmin edilib. Qalan ziyanın ödənilməsini təmin etmək məqsədilə əmlak üzərinə həbs qoyulması ilə yanaşı qanunla nəzərdə tutulmuş digər tədbirlər görülüb. **
R. Babayev