Azərbaycan Respublikası prezidentinin mətbuat xidməti Azərbaycan hakimiyyətinin $2,9 mlrd. məbləğində vəsaitin yuyulması üçün Böyük Britaniyada saxta şirkətlər istifadə etməsi ilə bağlı bir sıra KİV və QHT-lərin yaydığı məlumatları təkzib edib.
“Nə Azərbaycan Respublikasının prezidenti, nə də onun ailə üzvlərinin adıçəkilən yazılarda göstərilən ittihamlarla heç bir əlaqəsi yoxdur. Prezidenti və onun ailəsini bu məsələyə cəlb etmək cəhdləri tamamilə əsassızdır, qərəzlidir və təxribat xarakteri daşıyır”, - deyə mətbuat xidmətinin məlumatında qeyd edilir.
Bildirilir ki, xarici mətbuatda bu mövzuda məqalələrin arxasında Corc Soros dayanır.
“Biz bilirik ki, bunların arxasında Azərbaycana və onun rəhbərliyinə qarşı beynəlxalq aləmdə dələduz, saxtakar, fırıldaqçı, yalançı imicini qazanan Corc Soros və onun əlaltıları dayanır. Bu gün Corc Sorosun çirkin əməlləri çox ciddi şəkildə araşdırılmalıdır. Onunla əlbir olan erməni lobbisi Azərbaycan prezidentinə, onun ailəsinə qarşı çirkin kampaniya aparır. Ancaq bu səylərə baxmayaraq, bunlar heç bir nəticə verməyib. Elə “Guardian” qəzetində gedən məqalənin müəlliflərindən birinin erməni əsilli Dina Naqapetyan olması faktı da bir daha onu göstərir ki, bu çirkin ittihamlar, o cümlədən dünya erməniliyinin növbəti mənfur hərəkətidir”, - deyə məlumatda vurğulanır.*
F.İsazadə